დღეს აჭარის უმაღლეს საბჭოში ზურაბ პატარაძის აჭარის მთავრობის თავმჯდომარედ დანიშვნას უყრიან კენჭს. პატარაძე რწმუნებულად პრეზიდენტმა გუშინ დანიშნა და გუშინვე მოუხდა ამ გადაწყვეტილების მიზეზების განმარტება, პრეზიდენტის განცხადებით, ამ გადაწყვეტილების მთავარი მოტივაცია აჭარის მოსახლეობის ინტერესების დაცვა იყო და ამასთან პატარაძის კანდიდატურა შეთანხმებული იყო პრემიერმინისტრთან და ცენტრალურ მთავრობასთან.
„ეს იყო აჭარის ხელისუფლების შეუფერხებელი ფუნქციონირებისთვის სავალდებულოდ გადადგმული ნაბიჯი. თუ ვინმეს მიაჩნია, რომ გარდა იმისა, რომ არც ერთ აჭარელს, მოქალაქეს არ შეექმნას პრობლემა, უფრო მაღალი პრიორიტეტი არსებობს, ჩემთვის ეს არგუმენტი არის სუსტი,“- განაცხადა პრეზიდენტმა.
გუშინ აჭარაში საქართველოს პრეზიდენტის გიორგი მარგველაშვილის მიერ აჭარის მთავრობის რწმუნებულად ზურაბ პატარაძის დანიშვნას პოლიტიკოსების დიდი ნაწილის მხრიდან უარყოფითი რეაქცია მოჰყვა. ექსპერტების დიდი ნაწილი მის ამ გადაწყვეტილებას ანტიკონსტიტუციურ ქმედებას უწოდებს და განმარტავს, რომ კონსტიტუციის თანახმად, პრეზიდენტი რწმუნებულს ნიშნავს მხოლოდ იმ შემთხვევაში, თუ რეგიონის მთავრობა გადის კონსტიტუციის ფარგლებიდან ან მთავრობის საქმიანობით საფრთხე ექმნება ქვეყნის სუვერენიტეტს. მოცემულ შემთხვევაში კი არც ერთი შემთხვევა არ დაფიქსირებულა.