სასამართლოს გადაწყვეტილებას, „ცენტრ პოინტის" საქმეზე ბრალდებულთათვის წინასწარი პატიმრობის შეფარდების შესახებ, დაცვის მხარე გაასაჩივრებს. ადვოკატები მიიჩნევენ, რომ აღნიშნული გადაწყვეტილებით, მოსამართლე სამართლის ჩარჩოებს გასცდა. საქალაქო სასამართლოს გადაწყვეტილების სააპელაციო წესით გასაჩივრებას გეგმავს სალომე ჩარკვიანის ადვოკატიც. მარიკა ფხალაძის თქმით, ჩარკვიანთან მიმართებით აღკვეთის ღონისძიების სახით პატიმრობის გამოყენების არანაირი სამართლებრივი საფუძველი არ არსებობდა. პროკურორი კი მიიჩნევს, რომ ოთხივე ბრალდებულის მიმართ აღკვეთის ღონისძიების სახით პატიმრობის გამოყენების კანონმდებლობით გათვალისწინებული საფუძვლები არსებობდა.