აჭარის ახალი მთავრობის დასამტკიცებლად, უმაღლესი საბჭოს 11 დეპუტატის ხმაა საჭირო, თუმცა კოალიციაქართულ ოცნებას, რესპუბლიკელებისა და ეროვნული ფორმის წარმომადგენელთა ჩათვლით, აჭარის უმაღლეს საბჭოში მხოლოდ 9 დეპუტატი ჰყავს, რაც საკმარისი არ არის.
აჭარის მთავრობის ახალი მეთაურის დამტკიცება უმაღლეს საბჭოში მხოლოდ იმ შემთხვევაშია შესაძლებელი, თუ წარდგენილ კანდიდატურას, მხარს ფრაქცია ნაციონალური მოძრაობის ან თავისუფალი დემოკრატების წევრები მისცემენ. პროცედურის მიხედვით, აჭარის მთავრობის ახალ ხელმძღვანელს პრეზიდენტი პრემიერთან შეთანხმებით, აჭარის უმაღლეს საბჭოს 10 დღის ვადაში წარუდგენს. თუ უმაღლესი საბჭო ამ კანდიდატურას არ დაამტკიცებს, მაშინ პრეზიდენტს უფლება აქვს მას კანდიდატი განმეორებით წარუდგინოს.
აჭარის ავტონომიური რესპუბლიკის სტატუსის შესახებ, საქართველოს კანონის თანახმად კი, საქართველოს პრეზიდენტი უფლებამოსილია დაითხოვოს აჭარის ავტონომიური რესპუბლიკის უმაღლესი საბჭო, თუ მან ზედიზედ ორჯერ არ დაამტკიცა აჭარის ავტონომიური რესპუბლიკის მთავრობის თავმჯდომარის კანდიდატურა.
ამავე კანონის 11 მუხლის თანმად კი, აჭარის ავტონომიური რესპუბლიკის უმაღლესი საბჭოს უფლებამოსილება წყდება, დათხოვნის თაობაზე საქართველოს პრეზიდენტის ბრძანებულების ძალაში შესვლისთანავე.
აჭარის ავტონომიური რესპუბლიკის უმაღლესი საბჭოს დათხოვნის შემთხვევაში, მის უფლებამოსილებებს ახორციელებს დროებითი საპრეზიდენტო საბჭო, რომელსაც ნიშნავს საქართველოს პრეზიდენტი. დროებითი საპრეზიდენტო საბჭოს უფლებამოსილება წყდება აჭარის ავტონომიური რესპუბლიკის ახლადარჩეული უმაღლესი საბჭოს უფლებამოსილების ცნობისთანავე.
შეგახსენებთ, აჭარის მთავრობის ხელმძღვანელმა თანამდებობა დატოვა. განცხადება არჩილ ხაბაძემ რამდენიმე წუთის წინ გამართულ საგანგებო ბრიფინგზე გააკეთა.