საქართველოს საგარეო საქმეთა სამინისტრომ მცირე ხნის წინ გამართულ ბრიფინგზე თურქეთის ტერიტორიაზე მყოფ საქართველოს მოქალაქეებს მოუწოდა, თავი შეიკავონ საზოგადოებრივი თავშეყრის ადგილებში ყოფნისგან.
როგორც მინისტრის მოადგილემ დავით ჯალაღონიამ განაცხადა მომხდარი ტერაქტის შემდეგ, როგორც ქალაქ სტამბოლის, ასევე თურქეთის მთელ ტერიტორიაზე, უსაფრთხოების უმაღლესი დონეა გამოცხადებული.
„თურქული მხარის ინფორმაციაზე დაყრდნობით, ჩვენი თანამემამულეები დაღუპულთა და დაშავებულთა შორის კვლავ არ არიან. თუმცა, მონაცემები დინამიურად და მყისიერად იცვლება. სამწუხაროდ, რაოდენობა იზრდება, როგორც დაშავებულთა, ასევე დაღუპულთა. ამიტომ, შესაძლოა ყოველ წუთს შეცვლილი ინფორმაცია მივიღოთ. საქართველოს გენერალური საკონსულოს დახმარებით და საქართველოს პრემიერმინისტრის უშუალო მითითებით, მოქალაქეები, რომლებმაც ვერ მოახერხეს გამოფრენა და თავისით დამოუკიდებელი გადაადგილება, 100-ზე მეტი მოქალაქე განთავსდა სასტუმროებში,“- განაცხადა დავით ჯალაღონიამ.
მისივე ინფორმაციით, საქართველოს ყველა მოქალაქე, რომელიც ათათურქის აეროპორტში იმყოფებოდა, გადაყვანილია სასტუმროებში.
სტამბოლში არსებულ ვითარებაზე საუბრობს საქართველოს საგანგებო და სრულუფლებიანი ელჩი თურქეთში ირაკლი კოპლატაძე. მისი თქმით მიმდინარეობს მუშაობა, რომ საქართველოს მოქალაქეების დაბრუნება მაქსიმალურად შემჭიდროვებულ ვადებში მოხდეს. ელჩის ინფორმაციით, ამჟამად მიმდინარეობს გაუქმებული რეისების და შესაბამისად სატრანზიტო მგზავრების გადაყვანის განრიგზე მუშაობა. მისივე თქმით, მიმდინარეობს ერთობლივი მუშაობა შესაბამის ავიაკომომპანიებთან.
„იმ 36 დაღუპულს და 140-ზე მეტ დაშავებულს შორის, რომელთაგან 6 მძიმე მდგომარეობაშია, თურქეთის ხელისუფლების ოფიციალური განცხადებით, არიან უცხოელებიც. ამ დროისთვის მიმდინარეობს იდენტიფიცირება, დაღუპულთა შორის აბსოლუტური უმრავლესობა იდენტიფიცირებულია, ისინი არიან თურქი მოქალაქეები, რაც შეეხება დაშავებულებს, ამ მომენტში მიმდინარეობს იდენტიფიცირება და სტამბოლის საქართველოს საკონსულოს მუდმივი, 24 საათიანი კავშირი აქვს შესაბამის სამსახურებთან. ამ მომენტისათვის საქართველოს მოქალაქეების შესახებ ცუდი ინფორმაცია ჯერ არ შემოსულა. – აცხადებს ირაკლი კოპლატაძე.