წუხელ მოსული ძლიერი წვიმის გამო ზუგდიდში მარჯანიშვილის თეატრის სპექტაკლის ჩვენება ჩაიშალა. სპექტაკლი უნდა გამართულიყო ღია ცის ქვეშ, დადიანების სასახლეთა ისტორიულ-არქიტექტურული მუზეუმის პარტერში დადგმულ სცენაზე.
სპექტაკლისთვის ყველაფერი მზად იყო, ჩამოსული იყო დასი, იკრიბებოდა მაყურებელი, თუმცა ძლიერმა წვიმამ ყველაფერი ჩაშალა, რადგან ზუგდიდში არ აღმოჩნდა სხვა სივრცე, სადაც სპექტაკლის გადატანა მოხერხდებოდა, სამწუხაროდ, ზუგდიდის თეატრის ავარიულ შენობაში ეს იმთავითვე გამორიცხული იყო.
კოტე მარჯანიშვილის სახელობის სახელმწიფო თეატრს დაგეგმილი ჰქონდა ზუგდიდიდან დაეწყო რეგიონული ტურნე, რომელიც შექსპირის გარდაცვალებიდან 400 წლის თავს ეძღვნება. ლევან წულაძის მიერ დადგმული სპექტაკლი „როგორც გენებოთ“ , რომლის ნახვა ზუგდიდელმა მაყურებელმა ვერ შეძლო, ნაჩვენები იქნება მესტიაში, ოზურგეთში, ჭიათურაში, ქობულეთში, ხულოსა და ახალციხეში.
დასის წევრებმა სინანული გამოთქვეს, რომ ზუგდიდელ მაყურებელთან შეხვედრა ვერ შედგა და ხაზგასმით აღნიშნეს, რომ ამ ასწლოვანი თეატრალური ტრადიციის მქონე ქალაქში თეატრის შენობის რეკონსტრუქცია გადაუდებელი საქმეა.