ქართული მხარე გაუგებარს უწოდებს აფხაზეთის დე – ფატო სასამართლოს გადაწყვეტილებას , გიგა ოთხოზორიას მკვლელობაში ბრალდებულისთვის შინა პატიმრობის შეფარდების შესახებ.
შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილის თქმით, მსგავსი ფაქტების თავიდან აცილებისათვის მნიშვნელოვანია დამნაშავე კანონის შესაბამისად დაისაჯოს.
"ეს ტრაგიკული ფაქტი კიდევ ერთხელ ადასტურებს, რომ აუცილებელია ოკუპირებულ ტერიტორიებზე საერთაშორისო უსაფრთხოების მექანიზმების ამოქმედება," – აცხადებს ქეთევან ციხელაშვილი.
ქართული მხარე ამ საკითხს ყველა შეხვედრის ფორმატში დააყენებს. მათ შორის 6 ივლისს გალში დაგეგმილ ინციდენტების პრევენციისა და მათზე რეაგირების ჯგუფის შეხვედრაზე.
გუშინ გიგა ოთხოზორიას მკვლელობაში ეჭვმიტანილ რაშიდ კანჯიოღლუს ოკუპირებული აფხაზეთის დე-ფაქტო სამხედრო სასამართლომ შინა პატიმრობა მიუსაჯა. ამის შესახებ დე-ფაქტო აფხაზეთის სამხედრო პროკურორმა, ადგურ აგრბამ „სპუტნიკ აბხაზიას“ განუცხადა.
მისი თქმით, სამხედრო სასამართლომ არ დააკმაყოფილა სამხედრო პროკურატურის შუამდგომლობა კანჯი-ოღლუს დაპატიმრების შესახებ.