რუსთავი 2-ის საქმეებზე საკონსტიტუციო სასამართლოს პლენუმი იმსჯელებს – მოსამართლე მერაბ ტურავას შუამდგომლობით არხის ერთ-ერთ უკვე განხილულ სარჩელს თავიდან განიხილავს ცხრა მოსამართლე. მოსარჩელის განცხადებით მისთვის არსებითი მნიშვნელობა არააქვს მის საკითხს კოლეგია განიხილავს თუ პლენუმი, თუმცა თვლის, რომ ამ პროცედურებით ხდება სარჩელის განხილვისა და გადაწყვეტილების მიღების გაჭიანურება დროში.
რაც შეეხება საკონსტიტუციო სასამართლოს წარმომადგენლებს, მათი განმარტებით, მსგავსი პრაქტიკა, როდესაც საქმე კოლეგიიდან პლენუმს გადაეცემა, უკვე არსებობს.
„საკონსტიტუციო სასამართლოს შესახებ კანონმდებლობა ითვალისწინებს კოლეგიიდან პლენუმზე გადაცემის საფუძვლებს. მათ შორის ერთ-ერთი საფუძველია თუ საქმემ თავისი შინაარსით წარმოშვას საქართველოს კონსტიტუციის განმარტების მნიშვნელოვანი ან განსაკუთრებით იშვიათი სამართლებრივი პრობლემა,“-განაცხადეს საკონსტიტუციო სასამართლოში.
შეგახსენებთ, რომ საკონსტიტუციო სასამართლოს გასულ კვირას მოსამართლე მერაბ ტურავამ მიმართა შუამდგომლობით და მოითხოვა რუსთავი 2-ის სარჩელების პლენუმისთვის გადაცემა. მოსამართლე ტურავამ შუამდგომლობა საქმის განსაკუთრებულობით ახსნა, თუმცა მისი მოთხოვნა საეჭვოდ დაემთხვა სააპელაციო სასამართლოს მოსამართლეების სათათბიროდ გასვლის ფაქტს.