საპარლამენტო ოპოზიცია მწვავედ აკრიტიკებს საქართველოს პრემიერმინისტრის, გიორგი კვირიკაშვილის განცხადებას გიგა ოთხოზორიას მკვლელობასთან დაკავშირებით . – მკვლელის დაპატიმრებისა და საქართველოსთვის გადმოცემის რიხიანი მოთხოვნის მიღმა ისინი ხედავენ იმის შენიღბვის მცდელობას, რომ ხელისუფლებამ ამ დრომდე არ გამოიყენა და, როგორც ჩანს, არც აპირებს სათანადოდ გამოიყენოს რეალურად არსებული მექანიზმები .
განცხადებები ერთიან ნაციონალურ მოძრაობასა და თავისუფალ დემოკრატებში გაკეთდა.
პრემიერის განცხადებას გაუგებარს უწოდებენ და ხელისუფლებას მომხდარ მკვლელობასთან დაკავშირებით საჭირო მექანიზმების გამოუყენებლობაში ადანაშაულებენ დერთიანი ნაციონალური მოძრაობის წევრები. .„დღეს საქართველოს ხელისუფლება არ იყენებს იმ ეფექტურ მექანიზმებს, რათა დაისაჯოს ის ადამიანი, ვინც ასე თავხედურად მოკლა საქართველოს მოქალაქე,“ – განაცხადა აკაკი მინაშვილმა.
თავისუფალი დემოკრატები იმ ღონისძიებებზე საუბრობენ, რომელიც საოკუპაციო ხაზთან მოსახლეობის უსაფრთხოებისთვის უნდა გატარდეს. „სამწუხაროდ, არანაირი ბერკეტი არ არსებობს, რომ რეალურად განხორციელდეს და აღსრულდეს მართლმსაჯულება. თუმც, ხელისუფლება უფრო მეტად უნდა საუბრობდეს იმაზე, რა ქმედებებს მიმართავს ის,“ – განაცხადა ირაკლი ჩიქოვანმა.
გიორგი კვირიაშვილმა გუშინ გააკეთა განცხადება რომ, ხურჩაში მომხდარი სასტიკი დანაშაულის გამო კითხვის ნიშნის ქვეშ დადგა პოზიტივი, რასაც ქვეყნის მთავრობამ ნდობის აღდგენის მიმართულებით მიაღწია.