მმართველ პარტიასა და ოპოზიციურ ძალებს განსხვავებული მოსაზრებები აქვთ შინაგან საქმეთა სამინისტროს ბრალდებასთან დაკავშირებით, რომელიც კორცხელის ინციდენტის მონაწილე პირებს წაეყენა. უმრავლესობის ლიდერი ზვიად კვაჭანტირაძე თვლის, რომ ბრალდება არაადეკვატურია და ნაჩქარევი, ხელისუფლებას კი მეტი წინდახედულება უნდა გამოეჩინა, დაპირისპირება რომ არ მომხდარიყო .
“ნაციონალური მოძრაობის ლიდერები აქტიურობდნენ და ცალკე თემაა,როგორ აქტიურობდნენ, რამდენად დიდია მათი როლი ამ სამწუხარო ფაქტის ინსპირირებაში, ამიტომ ცოტა ნაადრევად მეჩვენება გადაწყვეტილება, რაც იქნა მიღებული კორცხელთან დაკავშირებით. ერთი ძალიან ცუდი ინციდენტის ასე მკაცრად განსჯა, მიუხედევად იმისა, რომ ჩვენ ვგმობთ ამ ინციდენტს, არ არის ადეკვატური,“ – განაცხადა მან რუსთავი 2 – ის ჟურნალისტებთან საუბარში.
ერთიანი ნაციონალური მოძრაობა ბრალდებულთათვის მიყენებული მუხლის გადაკვალიფიცირებას ითხოვს. ისინი თვლიან, რომ ეს იყო არა სპონტანურად წარმოქნილი, არამედ ორგანიზებული ინციდენტი.
„6 მოძალადეზე კი არ უნდა გადატყდეს ჯოხი, არამედ დამკვეთზე უნდა გავიდნენ. ჩვენ ვიცით, რომ ამის დამკვეთი იყო უშუალოდ კახი კალაძე. მან მიზანმიმართულად ჩამოიყვანა ეს ჯგუფი,“ – აცხადებენ ისინი.
საკითხთან დაკავშირებით, გამოძიების მიმდინარეობას ნაწილობრივ დადებითად აფასებს თავისუფალი დემოკრატების წევრი ზურაბ აბაშიძე, თუმცა აქვე აღნიშნავს, რომ უკვე ყველაფერი სასამართლოზეა დამოკიდებული.
„კარგია, რომ გამოძიება სადღაც მივიდა, მაგრამ მეორეა, გამოძიების შედეგები, როგორ გაითვალისწინებს და დაასაბუთებს ამას სასამართლო,“ – განაცხადა ზურაბ აბაშიძემ.