ამერიკის შეერთებული შტატების სპეციალური წარმომადგენლის, პიტერ კუკის განცხადებით, ჯიჰადისტებმა ნავთობის საცავებზე წვდომა დაკარგეს. ასევე მათ ჩაკეტილი აქვთ ფინანსური დახმარების მიღების ყველა წყარო.
ტერორისტულმა დაჯგუფება “ისლამურმა სახელმწიფომ” ამერიკის შეერთებული შტატების ანტიჯიჰადისტური კოალიციის ქმედებების შედეგად ერაყში დაპყრობილი ტერიტორიების 45% დაკარგა. სირიაში “ისლამური სახელმწიფოს” დანაკარგმა დაპყრობილი მიწების 16%-20% შეადგინა.
გუშინ ერაყის პროვინციაში საერთაშორისო კოალიციის ავიაიერიშის შედეგად ტერორისტული დაჯგუფება „ისლამური სახელმწიფოს“ ერთ-ერთი ლიდერის, ანბარ აბუ ბახიბის ლიკვიდაცია განხორციელდა. როგორც BBC წერს, ამის შესახებ პენტაგონმა განაცხადა.
პენტაგონის ოფიციალური წარმომადგენლის პიტერ კუკის განცხადებით, ავიაიერიში ავტომობილზე განხორციელდა, სადაც ბახიბი იმყოფებოდა. აშშ-ის თავდაცვის სამინისტროს ცნობით, ავიადარტყმის შედეგად „ისლამური სახელმწიფოს“ სამი მებრძოლის ლიკვიდაციაც განხორციელდა.
აღსანიშნავია, რომ მანამდე ანბარ აბუ ბახიბის ლიკვიდაციის შესახებ ინფორმაცია არაერთხელ გავრცელდა, თუმცა ამ დრომდე დაზუსტებული ინფორმაცია მისი დაღუპვის შესახებ არ არსებობდა.
დაჯგუფება „ალ-ქაიდას“ ყოფილი წევრი აბუ ბახიბი ერაყში ამერიკის შეიარაღებულმა ძალებმა დააკავეს და მას სიკვდილით დასჯა მიუსაჯეს, თუმცა 2012 წელს მან გაქცევა მოახერხა.