”საკონსტიტუციო სასამართლოს შესახებ” კანონში დღეს შეტანილი ცვლილებები საფრთხეს უქმნის ქვეყნის დემოკრატიულ განვითარებას და მათი ფორსირებული მიღება პარლამენტის მიერ განპირობებულია რუსთავი 2 – ის დადუმების მისწრაფებით – ასე აფასებს მთელი ოპოზიციური სპექტრი პარლამენტის დღევანდელი სხდომის შედეგებს.
დღევანდელი სესიის დანიშვნა გუშინ ღამით გამართულ ბიუროს სხდომაზე გადაწყდა, რომელიც ხმაურით მიმდინარეობდა. თავისუფალი დემოკრატებისა და ნაციონალური მოძრაობის წარმომადგენლებმა მოითხოვეს, არ გაეტანათ საბოლოო მოსმენით მიღებისათვის კანონპროექტი, რომლის საბოლოო ვარიანტს, არავინ, მათ შორის ვენეციის კომისიაც არ იცნობს. მაგრამ ოპოზიციის წინააღმდეგობის მიუხედავად, პარლამენტი სხდომა დაინიშნა, ერთიანი ნაციონალური მოძრაობის აღმასრულებელი მდივნის, სერგო რატიანის განცხადებით თემის განხილვა საგანგებოდ დაამთხვიეს ქართული ოცნების დღევანდელ ყრილობას.
ნაციონალური მოძრაობა სხდომას პროტესტის ნიშნად არ დაესწრო. უმრავლესობამ საჭირო ხმების მოსაპოვებლად თავისი ძალების სრულიმობილიზება მოახდინა – სესიას დაესწრო კობა დავითაშვილიც კი, რომელიც აქ დიდი ხანია არ გამოჩენილა. კანონპროექტს მისი ჩათვლით 81-მა დეპუტატმა დაუჭირა მხარი .
ოპოზიცია აცხადებს, რომ კანონი ამ სახით ანგრევს საკონსტიტუციო სასამართლოს და არღვევს კონსტიტუციას. ისინი მიმართავენ პრეზიდენტს თხოვნით ვეტო დაადოს მას.
”საკონსტიტუციო სასამართლოს შესახებ” კანონში ცვლილებების თანახმად, საკონსტიტუციო სასამართლოს ყველა წევრის ფიცის დადებიდან, ან საკონსტიტუციო სასამართლოს თავმჯდომარის უფლებამოსილების ვადაზე ადრე შეწყვეტიდან არა უგვიანეს ერთი თვისა, პლენუმის სხდომა ჩატარდება, რომელიც 5 წლის ვადით აირჩევს საკონტიტუციო სასამართლოს თავმჯდომარეს. ამავე წესით აირჩევს მის ორ მოადგილეს.
თავმჯდომარის კანდიდატურის არჩევაში აღარ ჩაერთვება პრეზიდენტი, პარლამენტის თავმჯდომარე და უზენაესი სასამარლოს თავმჯდომარე და კანდიდატურას თავად საკონსტიტუციო სასამართლოს მოსამართლეები წარადგენენ. ამასთან, საკონსტიტუციო სასამართლოს თავმჯდომარედ ან მის მოადგილედ არ შეიძლება აირჩეს პირი, მეორე ვადით.
გარდა ამისა, შედის კიდევ რამდენიმე ცვლილება და მათ შორის ისიც, რომ 2/3-მდე იზრდება საკონსტიტუციო სასამართლოს პლენუმის მიერ გადაწყვეტილების მიღების კვორუმი.