დღეს 9 მაისია – ფაშიზმზე გამარჯვების 71 -ე წლისთავი. ამ დღესთან დაკავშირებით ზუგდიდის მუნიციპალიტეტის სოფელ ახალაბასთუმანში მეორე მსოფლიო ომის გმირის გრიგოლ სხულუხიას ხსოვნას პატივი მიაგეს და მისი ძეგლი გვირგვინით შეამკეს ადგილობრივი ხელისუფლების წარმომადგენლებმა და სამამულო ომის ვეტერანებმა. გრიგოლ სხულუხიას მემორიალთან პატრიოტულ თემაზე ლექსები წაიკითხეს და სიმღერები შეასრულეს სკოლის მოსწავლეებმა.
მეორე მსოფლიო ომის გმირი გრიგოლ სხულუხია 1942 წელს დაიღუპა. ის დაზვერვაში მოქმედებდა და მნიშვნელოვან ინფორმაციას აგროვებდა მოწინააღმდეგეზე. გერმანელებთან ერთ-ერთი შერკინებისას გრიგოლ სხულუხია მძიმედ დაიჭრა და გონდაკარგული ტყვედ გერმანელებს ჩაუვარდა. გადმოცემის თანახმად, ის სასტიკად აწამეს, წამების დროს ზურგზე ვარსკვლავი ამოაჭრეს, თუმცა როცა მისგან საჭირო ინფორმაცია ვერ მიიღეს, 1942 წლის 1 მაისს კოცონზე დაწვეს. მეორე მსოფლიო ომის გმირის გრიგოლ სხულუხიას საფლავი დღემდე უცნობია.
ამჟამად სამეგრელო-ზემო სვანეთის მასშტაბით მსოფლიო ომის 67 ვეტერანი ცხოვრობს. აქედან 13 ქალაქ ზუგდიდშია, ხოლო 6 მუნიციპალიტეტში.
