სატრანსპორტო კომპანია "მეტრო ჯორჯია" ხვალიდან დედაქალაქის მიმართულებით რეისებს განაახლებს. ინფორმაცია ამის შესახებ კომპანიის ფეისბუქგვერდზეა გამოქვეყნებული, რომლის თანახმად, 17 მარტიდან, ყოველ დღე, აღმაშენებლის ქუჩიდან დედაქალაქის მიმართულებით გავა ავტობუსი. საიტზე განთავსებული ინფორმაციის თანახმად, მეტრო ჯორჯია პირველ რეისს დილის 8 საათიდან შეასრულებს.
პარალელურად, ვრცელდება ინფორმაცია, რომ მეტრო ჯორჯიას აღდგენილ რეისებს კვლავ პროტესტით და აქციებით შეხვდებიან დედაქალაქის მიმართულებით მოძრავი ავტობუსებისა და მიკროავტობუსების მძღოლები. როგორც ჩვენთვის გახდა ცნობილი, ისინი მეტრო ჯორჯიას ავტობუსს თბილისში მგზავრების გადაყვანის საშუალებას არ მისცემენ. ამ მიზნით, ისინი ხვალ დილიდან ზუგდიდში შეიკრიბებიან.
შეგახსენებთ, რომ სატრანსპორტო კომპანია "მეტრო ჯორჯიას" შემოსვლას ზუგდიდში დედაქალაქის მიმართულებით მოძრავი ავტობუსებისა და მიკროავტობუსების მძღოლები პროტესტით შეხვდნენ. ზუგდიდის ცენტრში მათი რეისების გაუქმების მოთხოვნით რამდენჯერმე აქციაც გაიმართა. ისინი აცხადებდნენ, რომ მეტრო ჯორჯია თურქული კომპანიაა, რომლის შემოსვლით ისინი სამუშაო ადგილებს დაკარგავენ, რომელიც მათთვის შემოსავლის ერთადერთი წყაროა. საპირისპიროს აცხადებენ მეტრო ჯორჯიაში, სადაც განმარტავენ, რომ მეტრო ჯორჯია ქართული კომპანიაა, რომელიც მომხმარებლებს კომფორტულ და უსაფრთხო მგზავრობას სთავაზობს.