პრემიერმინისტრი ირაკლი ღარიბაშვილი მთავრობის 3 წლის მუშაობის შედეგებს აფასებს.
"ჩვენ ვაძლიერებთ სახელმწიფო ინსტიტუტებს," – ეს ერთ-ერთი მთავარი მესიჯია, რომელიც მან შეფასების დროს გააჟღერა. "ინსტიტუტები ძლიერია, თუ მას ძლიერი ლიდერები, სწორი და პასუხისმგებლიანიადამიანები მართავენ. ჩვენ 3 წლის განმავლობაში გვყავს გამჭვირვალე, ანგარიშვალდებული მთავრობა და მმართველობის სისტემა,"- აცხადებს ღარიბაშვილი.
მისი თქმით, სასამართლო სისტემის მუშაობაში ხელისუფლება არ ერევა. მისივე თქმით, ჩარევისგან თავისუფალია მედია და დეპოლიტიზირებულია პოლიციაც.
"შეწყდა პოლიტიკური ნიშნით დევნა და დისკრიმინაცია ადამიანები განთავისუფლდნენ შიშისგან. დეპოლიტიზირებულია პოლიცია შექმნილია უმთავრესი წინაპირობა ბიზნესის და ეკონომიკის განვითარებისთვის. უზრუნველყოფილია სიტყვის თავისუფლება, მედიის საქმიანობაში ხელისუფლება არ ერევა, თავისუფალია სასამართლო ჩარევისგან," – აცხადებს ირაკლი ღარიბაშვილი.
პრემიერმინისტრმა ხაზგასმით აღნიშნა ევროკომისიის იმ გადაწყვეტილების მნიშვნელობა , რომლის შედეგად უახლოეს პერიოდში საქართველოს მოქალაქეები ევროკავშირის წევრ და პარტნიორ ქვეყნებში უვიზოდ იმოგზაურებენ.
"2012 წელს ჩვენ მიზნად დავისახეთ თანამედროვე ევროპული სახელმწიფოს მშენებლობა. ანუ ისეთი საქართველოს რომელშიც ხორცს შეისხამდა ჩვენი წინაპრების მუდმივი მისწრაფება, ვყოფილიყავით ერთიანი, ძლიერი განვითარებული ქვეყანა.
ამ მანდატით მოვედით ხელისუფლებაში და მას შემდეგ თავდაუზოგავად ვშრომობთ იმისათვის, რომ ვიყოთ ხელისუფლება, რომელსაც ჩვენი ხალხი იმსახურებს.
ჩვენი შრომის პირველი ისტორიული შედეგი სახეზეა. ევროპა უმაღლეს შეფასებას აძლევს ჩვენს წარმატებებს. ევროკავშირი ფართოდ გვიხსნის საზღვრებს. ეს ჩვენი შრომის უმაღლესი შეფასებაა. ყველას გილოცავთ ამ მიღწევას. ამიერიდან საქართველოს წინაშე ახალი შესაძლებლობები ისახება.
საზეიმო განწყობამ არ უნდა დაგვავიწყოს ჩვენს ქვეყანაში არსებული პრობლემები. თვალი უნდა გავუსწოროთ იმ პრობლემებს რაც გაგვაჩნია. ჩვენ ხალხს უნდა ვაჩვენოთ, რომ ქვეყანას სწორად ვმართავთ,"- აცხადებს ირაკლი ღარიბაშვილი.
პრემიერმინისტრმა აღნიშნა, რომ მოქმედი ხელისუფლებისთვის ფუნდამენტური ღირებულებაა ადამიანი, მისი უფლებები და თავისუფლება.