საფრანგეთის საზღვარზე ქართველი კაპიტნის მეთაურობით  მცურავი გემი კოკაინის დიდი პარტიით დააკავეს. გემზე იპოვეს  2 ათას 400 კილოგრამი ნარკოტიკული საშუალება, რომლის ღირებულება 50 მილიონი ევროა . სპეცოპერაცია საფრანგეთისა და დიდი ბრიტანეთის სამართალდამცველებმა ერთობლივად ჩაატარეს.

მოლდოვას დროშის ქვეშ მცურავი გემის  კაპიტანი ბათუმელი ბადრი ბერიძეა, ეკიპაჟის წევრებს შორის კი საქართველოს სხვა მოქალაქეებიც არიან.

ფრეგატი Carib Palm კოლუმბიიდან პოლონეთის ქალაქ გდანსკში რემონტისთვის მიცურავდა. ის ლა მანშის სრუტეში გააჩერეს და საფრანგეთის პორტ ბულონში გადაიყვანეს.

ეკიპაჟის 12-ვე დაკავებულ წევრს საფრანგეთში გაასამართლებენ. ქართველების გარდა, მათ შორის თურქეთის და უკრაინის მოქალაქეებიც არიან.

კაპიტან ბადრი ბერიძის შვილი გიორგი ბერიძე აცხადებს, რომ მამასთან კავშირი 10 დეკემბრის შემდეგ არ ჰქონია. ოჯახი საგარეო საქმეთა სამინისტრის დახმარებას სთხოვს.

საგარეო საქმეთა სამინისტროს პრესსამსახურში აცხადებენ, რომ  საფრანგეთში საქართველოს საელჩო გემის ქართველი კაპიტნის, ბადრი ბერიძის დაკავებასთან დაკავშირებით მუდმივ კონტაქტზეა ადგილობრივ სამართალდამცავებთან . ამ მომენტისთვის ინციდენტის ოფიციალური დეტალები არ ხმაურდება.