მთავრობის წევრები 15 დეკემბერს ვიზალიბერალიზაციასთან დაკავშირებით პოზიტიურ დასკვნას ელოდებიან. ევროკომისიის ანგარიშის გამოქვეყნებამდე მინისტრები განცხადებებს აკეთებენ, მათი განმარტებით, საქართველომ სამოქმედო გეგმის ყველა მოთხოვნა შეასრულა. 

საგარეო საქმეთა მინისტრი ამბობს, რომ ევროკავშირის ხელმძღვანელებს პოზიტიური მოლოდინები აქვთ ისევე, როგორც საქართველოს მთავრობას. 

"ჩვენ გვაქვს პოზიტიური მოლოდინი. ევროპელი ლიდერები, ევროკავშირის ხელმძღვანელებსაც აქვთ პოზიტიური მოლოდინები. ყველაფერი გავაკეთეთ იმისათვის, რომ ტექნიკური დასკვნა იყოს დადებითი. 15 კანონი მივიღეთ,"- აცხადებს გიორგი კვირიკაშვილი. 

ეკონომიკის მინისტრი გიორგი ქუმსიშვილი კი ამბობს, რომ მოთხოვნები 100%-ით არის შესრულებული.

"ყველა ტექნიკური დავალება, რომელიც იყო მოცემული ჩვენ პრაქტიკულად ყველაფერი 100% გვაქვს შესრულებული. ველით 15 დეკემბერს, როდესაც ევროკომისიაში უნდა მოხდეს დასკვნის გამოქვეყნება,"- განაცხადა ეკონომიკის მინისტრმა დიმიტრი ქუმსიშვილმა.