ვენესუელაში ჩატარებულ არჩევნებში პრეზიდენტ ნიკოლას მადუროს პარტიამ საპარლამენტო უმრავლესობა ვერ მოიპოვა.
უგო ჩავესის მიერ შექმნილი "ვენესუელის გაერთიანებული სოციალისტური პარტია" თავის ისტორიაში პირველად დამარცხდა. მათ მხოლოდ 46 საპარლამენტო მანდატი მოიპოვეს. ოპოზიციურმა პარტიამ "გაერთიანებული დემოკრატიული მრგვალი მაგიდა" კი 99 მანდატი მოიპოვა. დარჩენილი 22 მანდატის მფლობელის ვინაობა კი ჯერჯერობით უცნობია.
გამარჯვების შემდეგ ოპოზიციური პარტიის ლიდერმა ენრიკე კაპრილეს რადონსკიმ საკუთარ ამომრჩევლებს გამარჯვება მიულოცა და განაცხადა, რომ ვენესუელამ ერთადერთი სწორი გზა აირჩია.
ვენესუელაში არჩევნების შედეგებს გარკვეული მნიშვნელობა აქვს საქართველოსთვისაც. უგო ჩავესის მმართველობის პერიოდში მოხდა ვენესუელის მიერ აფხაზეთისა და სამხრეთ ოსეთის დამოუკიდებლობის აღიარება, შესაბამისად მის მიერ დაარსებული პარტიისა და პოლიტიკური მიმდევრების დამარცხება აჩენს ამ აღიარების უკან წაღების პერსპექტივას.
შეგახსენებთ, საქართველოსა და ვენესუელას დიპლომატიური ურთიერთობა არასოდეს ჰქონიათ. 2009 წლის შემდეგ, რაც უგო ჩავესმა სოხუმისა და ცხინვალის სეპარატისტული რეჟიმები აღიარა, კარაკასსა და თბილისს შორის ურთიერთობა ხაზგასმულად მტრული გახდა, იმ ზომამდეც კი, რომ, როცა დიქტატორი გარდაიცვალა, საქართველოდან ვენესუელაში სამძიმრის წერილი არ გაგზავნილა. მისი გარდაცვალებიდან ორ დღეში საქართველოს პარლამენტში ხმების უმრავლესობით გავიდა რეზოლუცია საგარეო პრიორიტეტებზე, სადაც საერთოდ აკრძალულია იმ ქვეყნებთან დიოლომატიური ურთიერთობა, რომლებმაც სოხუმისა და ცხინვალის დამოუკიდებლობა აღიარეს.