სახელმწიფო უსაფრთხოების სამსახურმა ტერორისტულ ორგანიზაციებთან კავშირში ბრალდებით 4 პირი დააკავა. 

ამასთან დაკავშირებით კონტრტერორისტულ ცენტრში გამართულ სპეციალურ ბრიფინგზე ითქვა, რომდაქირავებულის შეიარაღებულ კონფლიქტში მონაწილეობის ფაქტზე მიმდინარეობს გამოძიება საქართველოს სისხლის სამართლის კოდექსის 410-ე მუხლის მე-3 ნაწილით. მიმდინარე გამოძიების პროცესში, გამოიკვეთა რამდენიმე პირი, რომლებიც ემხრობიან ტერორისტული ორგანიზაციიის ,,ისლამური სახელმწიფოს'' იდეოლოგიას.

,,29 ნოემბერს მათ  მისამართებზე ჩატარდა ჩხრეკა, რის  შედეგადაც 4 პირის საცხოვრებელი სახლიდან ხელყუმბარები, ცეცხლსასროლი პისტოლეტები, საბრძოლო ვაზნები, მეხსიერების ბარათები, კომპიუტერული მოწყობილობები, ინტერნეტ მოდემები, სხვადასხვა ლიტერატურა, ინფორმაციის მატარებელი ელექტრონული მოწყობილობები CD და DVD დისკები და ისლამური სახელმწიფოს მიკუთვნებული დროშები ამოიღეს," – განაცხადა  სახელმწიფო უსაფრთხოების სამსახურის უფროსის მოადგილემ ლევან იზორიამ 

მისივე თქმით, 4 პირს ბრალი წარედგინა სისხლის სამართლის კოდექსის 236-ე მუხლის მე-2 ნაწილით. დაკავებული პირების ტერორისტულ ორგანიზაციასთან კავშირებისა და ტერორისტულ საქმიანობაში დახმარების ფაქტის დასადგენად მიმდინარეობს საგამოძიებო ღონისძიებები, დანიშნულია შესაბამისი ექსპერტიზები.

გრძელდება გამოძიება ტერორისტულ ორგანიზაციებთან კავშირზე მყოფი სხვა პირების მხილებისა და მათ მიმართ სისხლის სამართლებრივი დევნის განხორციელების მიზნით. 

უსაფრთხოების სამსახური დაკავებულთა ვინაობაზე არ საუბრობს. თუმცა მედიაში ვრცელდება     სავარაუდო ინფორმაცია იმის შესახებ, რომ  სამი მათგანი ოზურგეთის რაიონის სოფელ ნასაკირალიდანაა.

დაკავებულთა ოჯახის წევრები მათ ისლამურ სახელმწიფოსთან კავშირს გამორიცხავენ. მათთვის ასევე გაუგებარია, როგორ აღმოჩნდა მათივე ბინებში იარაღი.