გაეზრდება თუ არა სახელმწიფო უსაფრთხოების სამსახურს დაფინანსება? როგორც ცნობილია, ამის ინიციატორები თავისუფალი დემოკრატები არიან. მათთვის მიუღებელია მთავრობის ის განმარტებები და რეაქცია, რაც მოყვა დაფინანსების გაზრდის საკითხს.
ირაკლი ალასანია მოუწიდებს მთავრობას ადმინისტრაციული ხარჯები შეამციროს.
"უნდა გადაუჭირონ ქამრებს, ნაკლები ჯიპები იყიდონ, ნაკლები პრემიები მიიღონ, რომელიც მომავალი წლის ბიუჯეტის ხარჯებში უკვე გამოჩნდა, დააფინანსონ ჩვენი სამართალდამცავი სტრუქტურები, კონტრტერორისტული ცენტრი და საზღვრის დაცვის დეპარტამენტი," – განმარტავს ირაკლი ალასანია.
თავისუფალი დემოკრატების ლიდერს მიაჩნია, რომ დაფინანსების გაზრდასთან ერთად, ამ უწყებებს შორის რეალური კოორდინაცია უნდა ხდებოდეს.
ნაციონალურ მოძრაობაში საკითხის განხილვის მომხრე არიან. თუმცა, მათ მიაჩნიათ, რომ უსაფრთხოების სამსახურისთვის დაფინანსების გაზრდის საკითხზე მსჯელობა უშიშროების საბჭოს ფორმატში უნდა შედგეს.
"გაორმაგება არ უნდა მოხდეს მექანიკურად, არც ისე, როგორც ესმის მეჭიაურს ან ალასანიას. სწორედ ამიტომ მოვითხოვეთ ჩვენ უშიშროების საბჭოს მოწვევა პრეზიდენტის მიერ, რათა ზუსტად განისაზღვროს გაზრდილი საფრთხეები და ზუსტად ჩამოაყალიბოს სტრუქტურამ მისი საჭიროებები. ალბათ, ზუსტად ახლა ამ ახალი საფრთხეების წინაშე დადგა დრო, რომ ამ სტრუქტურას მართლაც განესაზღვროს ის ფუნქცია, რომელიც რეალურად უნდა ქონდეს. ის ამ წუთებში ოპოზიციას კი არ უნდა დასდევდეს და დაკითხვებზე კი არ უნდა იბარებდეს, ის სწორედ ამ საფრთხეების აღმოფხვრით უნდა იყოს დაკავებული," – აცხადებს გივი თარგამაძე.