საავტომობილო გზების დეპარტამენტი ავრცელებს ინფორმაციას საქართველოს გზებზე უამინდობის გამო შექმნილ პრობლემებთან დაკავშირებით.
საერთაშორისო მნიშვნელობის თბილისი–სენაკი–ლესელიძის საავტომობილო გზის 206–ე კმ-ზე მდინარე ჩხარას ადიდების გამო, უსაფრთხო გადაადგილების მიზნით იკრძალება ყველა სახის ავტოტრანსპორტის მოძრაობა.
ავტოტრანსპორტის მოძრაობა გადაირთო ზესტაფონი-ბაღდათი-ქუთაისის საავტომობილო გზაზე, მაგრამ ამ მონაკვეთზე აკრძალულია გადაადგილება მისაბმელიანი და ნახევრადმისაბმელიანი ავტოტრანსპორტით, ამასთან მოძრაობა საპატრულო პოლიციის უშუალო ზედამხედველობითა და კოორდინაციით ხორციელდება.
შეგახსენებთ , წლეულს თბილისი-სენაკი-ლესელიძის 206-ე კილომეტრზე ავტომაგისტრალის ნაწილი წყალმა უკვე მეხუთედ დააზიანა. ბოლოს აღდგენითი სამუშაოები ამ მონაკვეთზე გუშინ დასრულდა, მაგრამ, დღეს მდინარე ჩხარა ისევ ადიდდა და გზის საფარი კვლავ დააზიანა. ადგილზე მობილიზებულია ტექნიკა. თუმცა, ამინდის გაუმჯობესებამდე აღდგენითი სამუშაოები შეფერხებულია.