ყოფილი მეუღლის მიმართ ძალადობასა და გაუპატიურებაში ბრალდებულ დავით ჟორჟოლიანს ზუგდიდის რაიონულმა სასამართლო დღეს განაჩენი გამოუტანა – დამნაშავეს თავისუფლება 7 წლის ვადით აღეკვეთა. შესაბამისი გადაწყვეტილება მოსამართლე დავით გელაშვილმა გამოაცხადა. სასამართლოს გადაწყვეტილება ჟორჟოლიანის ოჯახის წევრებმა და ახლობლებმა ზუგდიდის საოლქო პროკურატურის წინ გააპროტესტეს. ისინი საქმის პროკურორთან შეხვედრას ითხოვდნენ, თუმცა უწყებიდან მათ არავინ გამოხმაურებიათ. ოჯახის განცხადებით, საქმის დეტალები გაყალბებულია და ისინი მეორე მხარის ადვოკატს ჯიტა გულუას და საქმის პროკუროროს მაია ჯაბუას ქრთამის აღებაში ადანაშაულებენ. ამასთან, ოჯახი აპირებს უჩივლოს ჯიტა გულუას, რადგან მიაჩნიათ, რომ საქმე პროკურორის და მეორე მხარის ადვოკატის შეკერილია. სასამართლოს დღევანდელ გადაწყვეტილებას ჟორჟოლიანების ოჯახი შემდგომ ინსტანციებში გაასაჩივრებს. სასამართლოს მიერ მიღებულ გადაწყვეტილებაზე და ოჯახის ბრალდებებზე კომენტარი დაზარალებულის ადვოკატმა ტელეკომპანია ოდიშთან გააკეთა. ჯიტა გულუას განცხადებით, სასამართლომ მოსამართლე დავით გელაშვილის თავმჯდომარეობით სამართლიანი გადაწყვეტილება მიიღო. რაც შეეხება დამნაშავის ოჯახის წევრების მიერ გამოთქმულ ბრალდებებს, ადვოკატ ჯიტა გულუას განცხადებით ეს ცრუ ბრალდებაა. დავით ჟორჟოლიანის წინააღმდეგ საქმე მიმდინარე წლის თებერვლის თვეში საქართველოს სისხლის სამართლის კოდექსის 121-ე და 138 -ე მუხლებით აღიძრა, რომელიც ძალადობას და სექსუალური ხასიათის ძალმომრეობით მოქმედებას გაუკუღმართებული ფორმით გულისხმობს.
აქცია პროკურატურასთან – ცოლის გაუპატიურებაში ბრალდებულს სასამართლომ 7 წლით პატიმრობა მიუსაჯა
Published on