უკრაინაში აფხაზური და ოსური სანომრე ნიშნების მქონე სატრანსპორტო საშუალებებს დააჯარიმებენ, რადგან უკრაინა აფხაზეთისა და ე.წ. სამხრეთ ოსეთის დამოუკიდებლობას არ აღიარებს. ამის შესახებ "რია ნოვოსტი" საპატრულო პოლიციის ფეისბუკის ოფიციალურ გვერდზე დაყრდნობით იტყობინება. განცხადების თანახმად, სამართალდამცავმა ორგანომ ქვეყნის საგარეო საქმეთა სამინისტროს, აფხაზეთისა და ე.წ. სამხრეთ ოსეთის სამართლებრივი სტატუსის შეფასების თხოვნით მიმართა, სადაც განუმარტეს, რომ უკრაინა აღნიშნულ "რესპუბლიკებს" მხოლოდ საქართველოს ნაწილად მიიჩნევს.
"საგარეო საქმეთა სამინისტროში აღნიშნეს, რომ უკრაინა ე.წ. "რესპუბლიკებს" დამოუკიდებელ ან სხვა სახელმწიფოების ნაწილებად არ აღიარებს, არამედ საქართველოს ნაწილად მიიჩნევს. ამიტომ ამ და სხვა არაღიარებული ფორმირებების სატრანსპორტო საშუალებების სანომრე ნიშნები – ნიშნების არარსებობის ექვივალენტია. ასეთ ვითარებაში სამართალდამცავი ორგანო კანონის შესაბამისად იმოქმედებს“ – ნათქვამია განცხადებაში.
,,ასეთების მეტი რა დადის ზუგდიდში? ჩვეულებრივად გადმოდიან აფხაზური ნომრებით და თბილისსა და სხვა ქალაქებშიც თავისუფლად გადაადგილდებიან. '' – მსგავსი კომენტარები თანდართული ფოტოფაქტებით ხშირად ვრცელდება სოციალურ ქსელებში.