ადვოკატ გიორგი მდინარაძეს ვაკე-საბურთალოს მეხუთე განყოფილებაში პოლიციელები ფიზიკურად გაუსწორდნენ. გიორგი მდინარაძე ამბობს, რომ მის ფიზიკურ შეურაცხყოფაში უშუალოდ განყოფილების უფროსიც მონაწილეობდა.
ადვოკატის მტკიცებით, ცემის მიზეზი მისი დაცვის ქვეშ მყოფთან დაკავშირებით არჩეული სტრატეგია გახდა – დაკავებული არასრულწლოვანი დუმილის უფლებას იყენებს. ადვოკატი პოლიციისთვის წინააღმდეგობის გაწევის ბრალდებითაც დააკავეს და მოგვიანებით ხელწერილით გაათავისუფლეს. იგი ტვინის შერყევით საავადმყოფოშია მოთავსებული
თბილისის პროკურატურაში პოლიციელების მიერ ადვოკატ გიორგი მდინარაძის ცემის ფაქტზე გამოძიება დაიწყო. პროკურატურის ცნობით, პოლიციის ცალკეული თანამშრომლების მიმართ თბილისის პროკურატურაში ადვოკატ გიორგი მდინარაძის ცემის ფაქტზე 333 მუხლის მესამე ნაწილით საქმეა აღძრული და ამ ეტაპზე გადაუდებელი საგამოძიებო მოქმედებები ტარდება.