ადვოკატთა ასოციაციის ხელმძღვანელი ზაზა ხატიაშვილი მთავრობას აძლევს 48 საათს იმისათვის, რომ მოხდეს ადვოკატ გიორგი მდინარაძის ცემის ფაქტის გამოძიება და დამნაშავე პირების დასჯა, წინააღმდეგ შემთხვევაში ის პერმანენტული აქციების გამართვას აპირებს როგორც საქართველოში, ასევე ქვეყნის ფარგლებს გარეთ.
"ვიღაც ხორცმეტებმაგადაწყვიტეს ერთ-ერთი საუკეთესო ადვოკატი ეცემათ და მიეყენებინათ შეურაცხყოფა მისთვის. ხელისუფლებას, ამ ტვინთხელებს მინდა მივცე 48 საათი. ყველა ჩვენი ევროპელი კოლეგა მზად არის საქართველოს საელჩოებთან დაიწყოს პიკეტირება. თუ არ მოხდა დამნაშავე პირების დასჯა არც ერთი ადვოკატი არ გავა პროცესზე. საქართველოს არც შს მინისტრი არც მთავარი პროკურორი არ ეყოლებათ. თუ ადვოკატთა კორპუსთან დაპირისპირება უნდათ ამ ფეოდალურ ხელისუფლებას მე, ზაზა ხატიაშვილი ვაჩვენებ, რა არის დაპირისპირება,"- აცხადებს ზაზა ხატიაშვილი.
კოლეგის ცემის ფაქტს გამოეხმაურა ადვოკატი ირმა ჭკადუა. ის ამბობს, რომ მომხდარი ფაქტი დასაგმობია და დროულ გამოძიებას ითხოვს.
"ეს არის სერიოზული გამოძიების საგანი,"- ასე ეხმაურებიან ახალგაზრდა იურისტთა ასოციაციაში გავრცელებულ ინფორმაციას, რომ სამართალდამცავებმა ადვოკატი გიორგი მდინარაძე სცემეს.
,,თუ ადვოკატი დაისაჯა მის მიერ პროფესიული მოვალეობის შესრულების გამო ძალიან სერიოზული საკითხია და სერიოზული გამოძიების საგანი უნდა გახდეს,"- განაცხადა ახალგაზრდა იურისტთა ასოციაციის ხელმძღვანელმა ანა ნაცვლიშვილმა.