დღეს გაიმართა ზუგდიდის მუნიციპალიტეტის საკრებულოს სხდომა, რომელზედაც საკრებულოს იურიდიული და სამანდატო კომისიის თავმჯდომარემ მაიზერ ნანავამ წარადგინა კომისიის დასკვნა, რომლის საფუძველზეც საკრებულოში „ქართული ოცნების“ ქვოტით გასულ კახა მიქაიას და „თავისუფალი დემოკრატებიდან“ გასულ ცოტნე მურღულიას ვადამდე შეუწყდათ უფლებამოსილება. საკრებულოს ამ გადაწყვეტილების მიზეზი გახდა კახა მიქაიასა და ცოტნე მურღულიას მიერ სხდომების გაცდენა 6 თვეზე მეტი ვადით
კახა მიქაიას მიმართ ამ გადაწყვეტილებას ხმა მისცა 24 დეპუტატმა, ცოტნე მურღულიას მიმართ – 25-მა. ხმის მიცემაში მონაწილეობა არ მიუღიათ საკრებულოს წევრებს „ერთიანი ნაციონალური მოძრაობიდან".
. უფლებამოსილება შეწყვეტილ კახა მიქაიას საკრებულოში პროპორციულ სიის მიხედვით მისი ადგილმონაცვლე ჯონი ზარანდია შეცვლის. რაც შეეხება ცოტნე მურღულიას, რომელიც სოფელ კორცხელის მაჟორიტარი დეპუტატია,მისი შემცვლელი უნდა განსაზღვროს მომავალი წლის მაისში დაგეგმილი შუალედური არჩევნების შედეგების მიხედვით.
კახა მიქაია მისთვის ვადამდე უფლებამოსილების შეწყვეტასტან დაკავშირებულ კომენტარებში ამბობს, რომ ღიმილით ხვდება ამ გადაწყვეტილებას. ,, ამ გადაწყვეტილებას ხუთი თვეა ველოდები და დღემდე ვერ მიიღეს. ეს არის ოცნებაში პორტირებული ნაციონალების გადაწყვეტილება, იმ მიზნით, რომ წამართვან ტრიბუნა. მიუხედავად ამისა, ჩემი კრიტიკული ხმა მომავალშიც იქნება ეთერში, თუ დღეს დავკარგე საკრებულოს ტრიბუნა, იმედი მაქვს წლებით დაკარგული რუსთავი 2-ის ტრიბუნა ღია იქნება ჩემთვის, – აცხადებს იგი.
საკრებულოს ფრაქცია „ერთიანი ნაციონალური მოძრაობა“ საკრებულოს დღევანდელ გადაწყვეტილებას კოალიციაში მიმდინარე დაპირისპირებას უკავშირებს და აცხადებს, რომ კენჭისყრაში მონაწილეობის არმიღებით გამოხატა ტავისი პრინციპული პოზიცია – არ ჩაერიოს „ქართული ოცნების“ შიდა დაპირისპირებაში.