გუშინ ზუგდიდის ცენტრში წამებისა და სექსუალური ძალადობის ამსახველი ვიდეოკადრების საჯარო ჩვენებასთან დაკავშირებით ქალაქ ზუგდიდის მერი ირაკლი გოგოხია განცხადებას ავრცელებს. „ცალსახად ვაცხადებთ, რომ ადგილობრივი თვითმმართველობა, კერძოდ კი მერია და მე, ქალაქის მერი ამ ჩვენების ორგანიზატორები არ ვყოფილვართ. – ნათქვამია განცხადებაში – ვფიქრობთ, რომ ეს დეზინფორმაცია მიზანმიმართულ ხასიათს ატარებს და მიმართულია ჩვენი დისკრედიტაციისკენ. ფილმის ჩვენების ორგანიზატორი ერთ-ერთი არასამთავრობო ორგანიზაცია ("საზოგადოებრივი აზრის დარბაზი") გახლდათ. რაც შეეხება ჩემი იქ ყოფნის მიზეზსა და მიზანს – ჩვენ გვქონდა ინფორმაცია, რომ გარკვეულ პირთა ჯგუფს პროვოკაციის მოწყობა სურდა, რის თავიდან ასაცილებლად ჩავთვალე საჭიროდ ადგილზე მივსულიყავი და აგვერიდებინა ეს დაპირისპირება, რაც საბედნიეროდ, მოვახერხეთ. კიდევ ერთხელ ვაცხადებ, რომ ქალაქ ზუგდიდში ე.წ. "კასრების კადრების" საჯარო ჩვენების ორგანიზატორი ქალაქ ზუგდიდის მერია არ ყოფილა“ – აღნიშნულია ქალაქ ზუგდიდის მერის ირაკლი გოგოხიას განცხადებაში.
საზოგადოებაში უკიდურესად ნეგატიური შეფასება მოყვა იმ ფაქტს, რომ გუშინ ზუგდიდში „საზოგადოებრივი აზრის დარბაზის“ მიერ ორგანიზებულ ადამიანის წამების ამსახველი კადრების საჯაროდ ჩვენებას ზუგდიდის ცენტრში ადგილობრივი თვითმმართველობის წარმომადგენლებიც დაესწრნენ. ჩვენებაზე მყოფმა ქალაქის მერმა ირაკლი გოგოხიამ ჟურნალისტებს განუცხადა, რომ "ეს კადრები ყველამ უნდა ნახოს", „საზოგადოებამ უნდა იცოდეს რა ხდებოდა, საიდან მოვდივართ და რა გვინდა ავაშენოთ, რომ შევცვალოთ ეს ყველაფერი."