ცალკეულ მედიასაშუალებებში ქვეყნდება გადაუმოწმებელი ინფორმაცია იმის შესახებ, რომ გუშინ სოხუმის პორტს მოადგა რუსული გემი, რომელმაც ოკუპირებულ აფხაზეთში 120 სირიელი ოჯახი ჩამოიყვანა. ოკუპირებული აფხაზეთის ხელისუფლებას ეს ფაქტი ოფიციალურად ჯერ არ დაუდასტურებია, თუმცა აფხაზეთისა და რუსეთის მედიასაშუალებებში მთელი სექტემბრის მანძილზე სისტემატურად ვრცელებოდა ინფორმაცია, რომ რაულ ხაჯიმბა თავის სხვადასხვა გამოსვლებში გამოთქვამდა მზაობას სირიელი დევნილების აფხაზეთში მიღებისათვის და მიმდინარეობდა მათ დასაბინავებლად განკუთვნილი სახლების კეთილმოწყობა. თუ ადრე ლაპარაკი იყო მაჰაჯირობის დროს სირიაში გადახვეწილ და იქ დამკვიდრებულ ეთნიკურ აფხაზებზე, ამჯერად უცნობია, ვის გულისხმობდა ამჯერად ხაჯიმბა: ექსკლუზიურად აფხაზებს თუ სირიის სხვა მოქალაქეებსაც.
გადაუმოწმებელი ცნობებით, სირიელ დევნილებს კომპაქტურად ოჩამჩირის რაიონში სოფელ ფოქვეშში ჩაასახლებენ.