უკრაინის პრეზიდენტმა პეტრე პოროშენკომ გაეროს ტრიბუნიდან რუსეთი უკრაინის ოკუპაციაში დაადანაშაულა. საკუთარი მიმართვის ძირითადი ნაწილი მან სწორედ რუსულ აგრესიაზე საუბარს დაუთმო.მისი თქმით, მიუხედავად იმისა, რომ მოსკოვი ოფიციალურად არ აღიარებს ღია სამხედრო ჩარევას, უკრაინის წინააღმდეგ ომს სწორედ ის აწარმოებს.
პოროშენკომ რუსეთზე ზეწოლის გაძლიერებისკენ საერთაშორისო გაერთიანებასაც მოუწოდა, რომ რუსეთის ციხეებში უკანონოდ მყოფი უკრაინის მოქალაქეები გათავისუფლდნენ.
უკრაინის პრეზიდენტის სიტყვით გამოსვლის დროს დარბაზი რუსეთის დელეგაციამ კვლავ პროტესტის ნიშნად დატოვა.
ეს იყო რუსული რევანში იმისათვის, რომ გუშინ პუტინის გამოსვლის დროს პოროშენკომ და უკრაინის დელეგაციამ სრული შემადგენლობით დემონსტრატიულად დატოვა გაეროს მთავარი დარბაზი, მანამდე კი დარბაზში უკრაინის დაცხრილული დროშა გაშალა. მან ამით კიდევ ერთხელ შეახსენა რუსეთის პრეზიდენტსა და მთელ მსოფლიოს დონბასში მიმდინარე მოვლენები.
ვლადიმერ პუტინმა კომენტარი მისი სიტყვით გამოსვლის დროს უკრაინის პრეზიდენტის დემარშზეც გააკეთა. მისი თქმით, დარბაზში პეტრე პოროშენკოს არყოფნა არ შეუმჩნევია. ხოლო უკრაინის დელეგაციას ურჩია პირადი ამბიციების გამომჟღავნებისგან თავი შეიკავონ.
ეს განცხადება მან რუსულ მედიასთან გააკეთა.