„შვლის ნუკრის ნაამბობი“- ამ სახელწოდების თოჯინური სპექტაკლით გაიხსნა ახალი თეატრალური სეზონი ზუგდიდის შალვა დადიანის სახელობის დრამატულ თეატრში. ვაჟა ფშაველას ნაწარმოების მიხედვით სცენაზე გაცოცხლებულმა პერსონაჟებმა მაყურებლის ოვაციები და მოწონება დაიმსახურა.
როგორც სპექტაკლის რეჟისორმა ნიკა საბაშვილმა აღნიშნა, იგი დარწმუნებული იყო, რომ მაყურებელს განსხვავებულ ჟანრში დადგმული სპექტაკლი მოეწონებოდა.
ზუგდიდის შალვა დადიანის თეატრის სამხატვრო ხელმძღვანელი ბადრი წერედიანი აღნიშნავს, რომ წარმოდგენა საინტერესო იყო არა მარტო პატარებისთვის, არამედ ყველა თაობის მაყურებლისთვის. მისი თქმით, სპექტაკლის რეჟისორი ნიკა საბაშვილი თავის თაობაში ერთ-ერთი საუკეთესოა, ამასთან სპექტაკლში ზუგდიდის თეატრალური დასის უნიჭიერესი მსახიობები გოგი გუგუჩია, ირაკლი სამუშია, მარინა დარასელია მზევინარ ჩარგაზია და სხვები მონაწილეობდნენ, რამაც განსაზღვრა სპექტაკლის წარმატება.
ახალ სეზონში თეატრი განახლებულ და მრავალფეროვან სარეპერტუარო პოლიტიკას გეგმავს – ეს მოიცავს წინა წლებში წერმატებული რამდენიმე ძველი სპექტაკლის აღდგენასაც, მაგრამ ძირითადი აქცენტი ახალ სპექტაკლებზე გაკეთდება, წლის ბოლოსთვის შედგება პრემიერა ფედერიკო გარსია ლორკას „სისხლიანი ქორწილისა'', რომელიც კლუტურის სამინისტროს დაფინანსებით იდგმება. იქნება გასვლითი სპექტაკლები, მეტი ინტენსივობით იმუშავებს თეტრთან არსებული სტუდია, რაც სხვა ფაქტორებთან ერთად ხელს შეუწყობს ახალი სახეების გამოჩენას და დამკვიდრებას დასში. – აღნიშნა ბადრი წერედიანმა.