დღეს 17 საათზე ზუგდიდის მუნიციპალიტეტის სოფელ ერგეტაში  ტრადიციული სამარიობო მარულა–2015 იწყება.

შეჯიბრში  სამეგრელოს სხვადასხვა მუნიციპალიტეტების ცხენოსნები მონაწილეობენ. ისინი ერთმანეთს ტრადიციულ სახეობებში – მარულაში, ღანკიშ ყოთამა–ყაბახსა და მორქიაში (მოქნევაში) შეეჯიბრებიან. გამარჯვებული ოთხ კატეგორიაში გამოვლინდება.

ცხენოსანთა შეჯიბრთან ერთად ერგეტაში სხვადასხვა კულტურული და სპორტული ღონისძიებები გაიმართება, მათ შორის   შეჯიბრება ქართულ ჭიდაობაში, სანახაობა ხალხური სიმღერებისა და ცეკვების თანხლებით წარიმართება.

დაწესებულია სხვადასხვა პრიზები გამარჯვებულებისა და უხუცესი ცხენოსნებისთვის.

მარულაზე დასწრება  თავისუფალია. დასწრების მსურველებს უფასო მუნიციპალური ავტობუსები მოემსახურება, ავტობუსები სამეგრელო-ზემო სვანეთის გუბერნიის შენობის მიმდებარე ტერიტორიიდან გავლენ.

ღონისძიების მხარდამჭერია სამეგრელო-ზემო სვანეთის მხარეში სახელმწიფო რწმუნებულის– გუბერნატორის ადმინისტრაცია, ზუგდიდის მუნიციპალიტეტის გამგეობა და ზუგდიდის მერია.

მარულა – 2015 – ისთვის მზადება საკმაო ხანია მიმდინარეობს, სარბიელზე   დაიდგა უსაფრთხოების ჯებირები, მოწესრიგდა ტერიტორია, მოეწყო მარულას, ყაბახისა და მოქნევის ზოლები.  დამონტაჟდა სცენა.

შეგახსენებთ, დღეს დაგეგმილ მარულამდე ორი დრით ადრე პრომო მარში (ტრადიციული გერულაფას თანამედროვე ვარიანტი) გაიმართა. მასში მონაწილეობა სამეგრელო ზემო-სვანეთის სამხარეო ადმინისტრაციისა და ზუგდიდის მერიის  თანამშრომლებმაც, მათ შორის ქალბატონებმაც მიიღეს.