დღეს იხსნება ევროპის მე-13 ახალგაზრდული ოლიმპიური ფესტივალი თბილისში.

გახსნის ცერემონიალი შედგება მიხეილ მესხის სახელობის სტადიონზე (ლოკომოტივი).  ამ  საზეიმო ღონისძიებაში, რომელიც 20:00 საათზე დაიწყება, 2000-მდე ადამიანი მიიღებს მონაწილეობას. ორგანიზატორთა ცნობით, ეს იქნება  გრანდიოზული შოუ, რომლის პროგრამაში წარმოდგენილი იქნება ძველი და ახალი ქართული კულტურის ნიმუშები, მათ შორის  ექსპოზიცია "არგონავტები", ქართული ცეკვები  "სუხიშვილების"   შესრულებით  და ა.შ. 

ოფიციალურ ნაწილში სიტყვით გამოვა ევროპის ოლიმპიური კომიტეტების პრეზიდენტი პატრიკ ჰიკი.

ევროპის  ოლიმპიური ფესტივალი  1 აგვისტომდე გაგრძელდება. ოლიმპიური ფესტივალის საორგანიზაციო კომიტეტის ინფორმაციით ამ პერიოდში თბილისს 50 ქვეყნის 3800-მდე სპორტსმენი ეწვევა. 

შეჯიბრებები სპორტის 9 სახეობაში გაიმართება და მაყურებლებისთვის დასწრება თავისუფალი იქნება.

მაყურებელს მიხეილ მესხის სტადიონზე მოხვედრა 19:00 საათამდე შეეძლება. გარდა ამისა, თბილისის მერიის ცნობით, საზოგადოების მაღალი ინტერესიდან გამომდინარე, ვაკის პარკში  დამონტაჟდება მონიტორი, რომლის საშუალებითაც მსურველები პირდაპირ ეთერში შეძლებენ  გახსნის ცერემონიის ნახვას.