საქართველო პატივს მიაგებს 22 წლის წინათ დაბა ტამიშთან რუსეთის სამხედრო ხომალდიდან გადმოსხმულ საზღვაო დესანტთან ბრძოლაში დაღუპულთა ხსოვნას.
დაღუპული გმირების პატივსაცემად გმირთა მოედანზე აღმარტულ მემორიალთან მივიდნენ საქართველოს შეიარაღებული ძალების გენერალური შტაბისა და თავდაცვის სამინისტროს ხელმძღვანელი პირები, აფხაზეთის ომის ვეტერანები, დაღუპულთა თანამებრძოლები, ოჯახის წევრები და ახლობლები. .
თავდაცვის მინისტრმა თინათინ ხიდაშელმა ქართველი მებრძოლების გმირობასა და მშვიდობის მნიშვნელობაზე ისაუბრა
„ჩვენი ისტორიისთვის ეს ერთ-ერთი ყველაზე ტრაგიკული დღეა. აფხაზეთის ომის დროს ბევრი მძიმე დღე იყო, მაგრამ ვეტერანებისთვის, საქართველოსთვის, ჩვენი ქვეყნის ისტორიისთვის ეს ერთ-ერთი ყველაზე უფრო დასამახსოვრებელი დღეა. ვფიქრობ, ყველა ასეთი დღე საუკეთესო მაგალითი და საუკეთესო საჩვენებელია მომავალი თაობებისთვის – როგორ იბრძოდნენ მათი მშობლები, მათი წინაპრები ქვეყნის დამოუკიდებლობისთვის და რამდენად მძიმეა ომის შედეგები. ყველამ ყველაფერი უნდა ვაკეთოთ იმისთვის, რომ უზრუნველვყოთ მშვიდობა ქვეყანაში, რომ ასეთი დღეები არასოდეს მეორდებოდეს",-განაცხადა თინა ხიდაშელმა.