ფეხბურთის ფედერაციის პრეზიდენტის ზვიად სიჭინავას განცხადებით, biletebi.ge-ზე შექმნილი  ყველა ტექნიკური პრობლემა აღმოფხვრილია და უეფა-ს სუპერთასის თამაშზე დასასწრები ბილეთის შეძენა ხვალ, დილის 09:00 საათიდან იქნება შესაძლებელი.  

biletebi.ge-ის ტექნიკური დირექტორის გიორგი ჩხიკვიშვილის განცხადებით, კომპანია ბილეთების გაყიდვისთვის მზად არის. 

"საიტზე ერთი წუთის განმავლობაში 50 ადამიანის შესვლა იქნება შესაძლებელი.    საიტზე შემოსულ ადამიანს მიენიჭება რიგის ნომერი და ეცნობება სავარაუდო დრო, თუ როდის შეძლებს ბილეთის ყიდვას. ერთ ადამიანს მაქსიმუმ 4 ბილეთის ყიდვა შეეძლება", – თქვა ჩხიკვიშვილმა. მისივე თქმით, შექმნილი პრობლემების გამო UEFA-ს კომპანიისთვის არანაირი სანქცია არ დაუწესებია.

შეგახსენებთ, რომ UEFA-ს სუპერთასის ფინალური შეხვედრა, რომელზეც ბარსელონა და სევილია ერთმანეთს დაუპირისპირდებიან, თბილისში 11 აგვისტოს დინამო არენაზე გაიმართება. მატჩი 22:45 საათზე დაიწყება.