ევროკავშირთან ასოცირების შეთანხმების დღის წესრიგში გათვალისწინებულია ვალდებულება იმის შესახებ, რომ უნდა გაძლიერდეს ეროვნული ბანკის დამოუკიდებლობა – აცხადებს ევროკავშირის ელჩი იანოშ ჰერმანი ეროვნული ბანკიდან ზედამხედველობის სამსახურის გამოყოფის საკითხთან დაკავშირებით.
„ჩვენ თვალს ვადევნებთ ამ კანონპროექტთან დაკავშირებულ განხილვებს და ვეცნობით ქართველი პოლიტიკოსებისა და საერთაშორისო ინსტიტუტების, მათ შორის სავალუტო ფონდის მიერ გაკეთებულ განცხადებებს. ევროკავშირი ეროვნული ბანკების, როგორც ძლიერი ინსტიტუტების დამოუკიდებლობის მტკიცე დამცველია. უნდა აღინიშნოს, რომ საქართველოსა და ევროკავშირს შორის ასოცირების დღის წესრიგში არის ვალდებულება გაძლიერდეს საქართველოს ეროვნული ბანკის დამოუკიდებლობა ევროპული პრინციპების გათვალისწინებით. თუ საქართველოს ხელისუფლება მოინდომებს, ევროკავშირი მზადაა ამ სფეროს ექსპერტები გამოაგზვანოს. განაცხადა ჰერმანმა „რუსთავი 2“-თან საუბრისას.