დღეს გამართულ ქალაქ ზუგდიდის მუნიციპალიტეტის საკრებულოს რიგგარეშე სხდომაზე დეპუტატებმა რამდენიმე საკითხი განიხილეს, მათ შორის ქალაქ ზუგდიდის მუნიციპალიტეტის საკუთრებაში არსებული ქონების საპრივატიზაციო ნუსხის და ქალაქ ზუგდიდის მუნიციპალიტეტის ქონების პრივატიზების გეგმის დამტკიცების თაობაზე. საკითხი ხმათა უმრავლესობით დაამტკიცეს, თუმცა წინააღმდეგი იყო ფრაქცია „ნაციონალური მოძრაობის“ წევრი ბათლომე შელია, რომელმაც ეჭვი გამოთქვა იმასთან დაკავშირებით, რომ საპრივატიზაციო ნუსხაში შეტანილი მოთხოვნები მორგებულია ერთ კონკრეტულ კომპანიაზე, რომელიც დეპუტატის განცხადებით „მაკდონალდსის“ კონკურენტი კომპანია ვენდია, რომელიც მსოფლიოში ერთ-ერთი ყველაზე მსხვილი ამერიკული რესტორნების ქსელია. დეპუტატის კითხვებს ქალაქ ზუგდიდის მერიაში უპასუხეს.ეკონომიკისა და ინფრასტრუქტურის განვითარების სამსახურის უფროსი ჯიმშერ შეროზიას განმარტებით, მერია საპრივატიზაციოდ ობიექტის გატანას აპირებს. მათგან, პირველ აუქციონზე კედიას ქუჩაზე მდებარე სახანძრო-სამაშველო სამსახურის ობიექტი გავა. ამასთან, შეროზია კონკრეტულ კომპანიას არ ასახელებს, თუმცა ცალსახად აცხადებს, რომ თუ ვენდი დაინტერესდება ქალაქში ინვესტიციების ჩადებით, ზუგდიდის მერია აღნიშნულს მიესალმება.
გარდა ამისა, ქალაქის მერია აუქციონზე ყოფილი სასტუმრო „ოდიშის“ მეორე და მესამე სართულების გატანასაც გეგმავს.