დღეს სოხუმში რაულ ხაჯიმბა ატარებს პრესკონფერენციას აფხაზური მედიისათვის ვლადიმერ პუტინთან გამართული შეხვედრის შედეგების შესახებ.
როგორც ცნობილია, გუშინ სოჭში შედგა შეხვედრა რუსეთის ფედერაციის პრეზიდენტს, ვლადიმერ პუტინსა და აფხაზეთის დე-ფაქტო ლიდერს რაულ ხაჯიმბას შორის. შეხვედრა დაახლოებით ერთ საათს გაგრძელდა. შეხვედრაზე განხილულ იქნა მხარეებს შორის თანამშრომლობისა და სტრატეგიული პარტნიორობის შესახებ გასული წლის ნოემბერში ხელმოწერილი შეთანხმების რეალიზაციის საკითხები, კერძოდ, უახლოესი გეგმები თავდაცვის ერთობლივი უზრუნველყოფის, ინვესტიციებისა და რუსეთის მხრიდან ფინანსური დახმარების სფეროში. აფხაზური მედიის ცნობით, ამ დროისათვის აფხაზეთსა და რუსეთს შორის ხელმოწერილია 80 – ზე მეტი ხელშეკრულება და შეთანხმება, რომელიც პრაქტიკულად ეხება თანამშრომლობის ყველა სფეროს. უახლოეს ხანებში ხელი მოეწერება კიდევ 30 ასეთ დოკუმენტს.