აჭარის უმაღლეს საბჭოში “ნაციონალური მოძრაობის” დეპუტატს, პეტრე ზამბახიძეს კვერცხები დაუშინეს. ინციდენტი ბათუმში “დემოკრატიული ჩართულობის ცენტრის” ოფისში მოხდა.
მერაბ ღოღობერიძე, გიორგი თუშმალიშვილი და კიდევ რამდენიმე პირი შენობაში შევიდა და პეტრე ზამბახიძეს კვერცხები ესროლა. ისინი დეპუტატს პასუხს სთხოვდნენ იმის გამო თუ რატომ დაუჭირა მხარი ზამბახიძემ გუშინ ჯემალ ფუტკარაძის ვიცესპიკერად არჩევას.
ახალგაზრდები დეპუტატს 26 მაისის, 7 ნოემბრის აქციების დარბევის მხარდამჭერად მოიხსენიებდნენ.
თავად პეტრე ზამბახიძე აცხადებს, რომ მსგავსი უკანონო ქმედებები ხელისუფლების მიერ არის ინიცირებული.
“ეს დაჯგუფება ცდილობს, რომ განსხვავებულ აზრს ებრძოლონ. ესენი არიან “ქართული ოცნების” აქტივისტები. მე მოვუწოდებ არჩილ ხაბაძეს, ავთანდილ ბერიძეს და ყველას – გონს მოვიდნენ. ის ქმედებები, რასაც განახორციელებენ ქართული მედიის, არასამთავრობო სექტორისა და დამოუკიდებელი ოპოზიციის წინააღმდეგ ბუმერანგივით დაუბრუნდება არჩილ ხაბაძეს, ავთანდილ ბერიძესა და ყველას, ვინც ამის უკან დგას” , – აცხადებს პეტრე ზამბახიძე.