გორის მუნიციპალიტეტის სოფელ მერეთში რუსეთის საოკუპაციო ძალების წარმომადგენლებმა ახალი ბოძები დაამონტაჟეს.
სამხედრო-საინჟინრო ჯგუფის წევრები მერეთში გუშინ გამოჩნდნენ. ადგილობრივების თქმით, მათ რამდენიმე შეიარაღებული პირის გადაადგილება შენიშნეს. როგორც წესი, საინჟინრო ჯგუფის წევრების მუშაობის დროს, მის წევრებს ოკუპანტთა პატრული იცავს.
ახალი ბოძების დამონტაჟებას ადასტურებენ სუს-შიც. უწყებაში ამბობენ, რომ საქმის კურსში ჩააყენეს საერთაშორისო ორგანიზაციები, ევროკავშირის სადამკვირვებლო მისია და რომ გააქტიურებულია ცხელი ხაზი.